(୨୦)ମୂଲ୍ୟ ଓ ଆଧ୍ୟାତ୍ମିକ ଶିକ୍ଷା(୨୦)--- ମୂଲ୍ୟ କ’ଣ?
🌺🌺🌺🌺🌺🌺🌺🌺🌺
*ମୂଲ୍ୟ ଓ ଆଧ୍ୟାତ୍ମିକ ଶିକ୍ଷା(୨୦)*
🌻🌻🌻🌻🌻🌻🌻🌻🌻
🌼🌼 *ମୂଲ୍ୟ କ’ଣ?* 🌼🌼
🌹🌹🌹🌹🌹🌹🌹🌹🌹
*ଡା: ସୁଧାଂଶୁ ଶେଖର ମିଶ୍ର, ପାଟଣାଗଡ*
🌷🌷🌷🌷🌷🌷🌷🌷🌷
ପ୍ରତ୍ୟେକ ବସ୍ତୁର ମୂଲ୍ୟ ତା’ର ଲାଭ କାରିତା, ଆବଶ୍ୟକତା ତଥା ଉପଯୋଗିତା ଉପରେ ନିର୍ଭର କରେ । ସାଧାରଣତଃ କୌଣସି ବସ୍ତୁର କ୍ରୟ ବା ବିକ୍ରୟ ପାଇଁ ଆବଶ୍ୟକ ହେଉଥିବା ଧନ-ରାଶିକୁ ମୂଲ୍ୟ କୁହାଯାଏ । କିନ୍ତୁ କୌଣସି କାର୍ଯ୍ୟର ସଫଳତା ତଥା ସିଦ୍ଧି ପାଇଁ କରାଯାଉଥିବା ପୁରୁଷାର୍ଥ ବା ପରିଶ୍ରମକୁ ମଧ୍ୟ ମୂଲ୍ୟ କୁହାଯାଇଥାଏ । କାରଣ ସିଦ୍ଧି ବା ସଫଳତା ପାଇଁ ଉଦ୍ୟମ, ପରିଶ୍ରମ, ସମୟ, ବୋଧଶକ୍ତି ଇତ୍ୟାଦି ବିନିଯୋଗ କରିବାକୁ ପଡେ ।
*ଭୌତିକ ମୂଲ୍ୟ ଏବଂ ଆଧ୍ୟାତ୍ମିକ ମୂଲ୍ୟ*
ସଂସାରିକ ଓ ଶାରୀରିକ ସୁଖକୁ ପ୍ରାଥମିକତା ଦେଉଥିବା ବ୍ୟକ୍ତିକୁ ଭୌତିକବାଦୀ କୁହାଯାଏ । ତାଙ୍କ ପାଇଁ ଧନ ଭବ୍ୟ ବାସଗୃହ, ଭୋଗ୍ୟ ପଦାର୍ଥ ଇତ୍ୟାଦି ଅଧିକ ମୂଲ୍ୟ ମନେ ହୁଏ । ଏହିପରି ଭୌତିକ ପଦାର୍ଥ ସମୂହକୁ ମହତ୍ତ୍ବ ପ୍ରଦାନ କରିବା ହେଉଛି ଭୌତିକ ମୂଲ୍ୟ କିନ୍ତୁ ଏହା ବିନାଶଶୀଳ ଏବଂ ଦୁଃଖ ପ୍ରଦାୟକ ଅଟେ । ସଂପ୍ରତି ଅଧିକାଂଶ ବ୍ୟକ୍ତି ଭୌତିକ ମୂଲ୍ୟକୁ ପ୍ରାଥମିକତା ଦେଉଥିବା ହେତୁ ମାନବ ସମାଜର ଅଧୋପତନ ହେଉଛି । ସହନଶୀଳତା, ସନ୍ତୁଷ୍ଟତା, ପରୋପକାରୀତା, ଦାନଶୀଳତା ଆଦି ଆଧ୍ୟାତ୍ମିକ ମୂଲ୍ୟ ବ୍ୟବହାରିକ ଜୀବନରେ ପ୍ରୟୋଗ କରୁଥିବା ବ୍ୟକ୍ତିକୁ ଅଧ୍ୟାତ୍ମବାଦୀ କୁହାଯାଏ । ତାଙ୍କ ପାଇଁ ଭୌତିକ ସାମଗ୍ରୀ, ଇନ୍ଦ୍ରିୟ ସୁଖ ପ୍ରଦାନକାରୀ ପଦାର୍ଥ ଏବଂ ଇହ ଲୌକିକ ପ୍ରାପ୍ତି କ୍ଷଣ ଭଙ୍ଗୁର, ପରିଣାମୀ, ଅସ୍ଥାୟୀ, ବିନାଶଶୀଳ ଏବଂ କାମନା ଭଦ୍ରେକକାରୀ ଅଟେ । ସମ୍ୟକ (ସଂପୂର୍ଣ୍ଣ) ଆତ୍ମାନୁଶୀଳନକୁ ଆଧ୍ୟାତ୍ମିକତା କୁହାଯାଏ । ବ୍ୟବହାରିକ ଜୀବନରେ ଆଧ୍ୟାତ୍ମିକତାକୁ ଅଙ୍ଗୀକାର କଲେ ଆଧ୍ୟାତ୍ମିକ ମୂଲ୍ୟ ସମୂହ ଧାରଣ କରିବା ସହଜ ହୋଇଥାଏ ।
*ମୂଲ୍ୟ ଏବଂ ଆଧ୍ୟାତ୍ମିକ ଶିକ୍ଷା କାହିଁକି ଆବଶ୍ୟକ?*
ସଂପ୍ରତି ମାନବ ସମାଜ ଭୟଙ୍କର ମୂଲ୍ୟ ସଂକଟ ମଧ୍ୟ ଦେଇ ଗତି କରୁଛି । ସାମାଜିକ, ରାଜନୈତିକ, ଧାର୍ମିକ, ପାରିବାରିକ, ଶୈକ୍ଷିକ ପ୍ରତ୍ୟେକ ସ୍ତରରେ ମୂଲ୍ୟ ସଂକଟ ସ୍ପଷ୍ଟ ପ୍ରତିଭାତ ହୁଏ । ପରିଣାମ ସ୍ବରୂପ ସମାଜରେ ଭ୍ରଷ୍ଟାଚାର ଏବଂ ଅନୈତିକ କାର୍ଯ୍ୟ, ହିଂସା, ମାଦକ ଦ୍ରବ୍ୟଗୁଡିକର ବ୍ୟବହାର ଲିଙ୍ଗ ଭେଦ, ଅପମିଶ୍ରଣ, ସାଂପ୍ରଦାୟିକତା ଆଦି ଦିନକୁ ଦିନ ବୃଦ୍ଧି ପାଉଛି । ମୂଲ୍ୟ ରହିତ ବିଜ୍ଞାନ ଏବଂ ପ୍ରଯୁକ୍ତି ବିଦ୍ୟା ହେତୁ ଉପଭୋକ୍ତାବାଦ ପ୍ରତି ମଣିଷର ଆକର୍ଷଣ ବଢି ଚାଲିଛି । ଏହି କାରଣରୁ ତା’ ମଧ୍ୟରେ ଲୋଭ ବୃତ୍ତି ବଢୁଛି । ଅତ୍ୟଧିକ ପରିଶ୍ରମ ବା ଲାଞ୍ଚ ଏବଂ ଭ୍ରଷ୍ଟାଚାର ଦ୍ୱାରା ପର୍ଯ୍ୟାପ୍ତ ଧନ ସଂଗ୍ରହ କରିବା ମନୁଷ୍ୟର ଏକମାତ୍ର ଧ୍ୟେୟ ହୋଇ ଯାଇଛି । ସଂପ୍ରତି ଶିକ୍ଷାର ମୁଖ୍ୟ ଉଦ୍ଦେଶ୍ୟ କେବଳ ଭୌତିକ ବିକାଶ ଏବଂ ଧନୋପାର୍ଜନ ।
ଏକଦା ଏହି ବିଶ୍ୱର ପ୍ରତ୍ୟେକ ମାନବ ସୁଖ, ଶାନ୍ତି, ସମୃଦ୍ଧି ଏବଂ ପବିତ୍ରତା ସମ୍ପନ୍ନ ଥିଲେ । କାରଣ ତତ୍କାଳୀନ ସମାଜରେ ସମସ୍ତେ ମୂଲ୍ୟ ଏବଂ ଆଧ୍ୟାତ୍ମିକତାରେ ପରିପୂର୍ଣ୍ଣ ଥିଲେ । ଆଜି ସଂସାର ଭୟ, ଆତଙ୍କ ଓ ଦୁଃଖରେ ତ୍ରସ୍ତ । ଏହାର ଏକମାତ୍ର କାରଣ ମୂଲ୍ୟ ହ୍ରାସ । ପ୍ରତ୍ୟେକ ସ୍ତରରେ ମୂଲ୍ୟ ଏବଂ ଆଧ୍ୟାତ୍ମିକ ଶିକ୍ଷାର ବ୍ୟାପକ ପ୍ରଚଳନ ଦ୍ୱାରା ସେ ବ୍ୟସନ ମୁକ୍ତ ହୋଇ ମାନସିକ ଚାପମୁକ୍ତ ହୁଏ । ମୂଲ୍ୟ ଏବଂ ଆଧ୍ୟାତ୍ମିକ ଶିକ୍ଷା ଭଲ ମନ୍ଦର ଜ୍ଞାନ ଦିଏ! ବ୍ୟକ୍ତିକୁ ମନୋବିକାରରୁ ମୁକ୍ତ ହେବାର କୌଶଳ ଶିଖାଏ ଯଦ୍ଦ୍ବାରା ସୂକ୍ଷ୍ମ ସ୍ତରରେ ସାମାଜିକ ପରିବର୍ତ୍ତନ ହୁଏ । ଏକଥା ଏବେ ଶିକ୍ଷାବିତମାନେ ମଧ୍ୟ ସ୍ବୀକାର କଲେଣି । ବ୍ୟକ୍ତିଗତ ସ୍ତରରେ ମୂଲ୍ୟ ଶିକ୍ଷା ପ୍ରତ୍ୟେକ ବ୍ୟକ୍ତିର ଆନ୍ତରିକ ଶକ୍ତିକୁ ବୃଦ୍ଧି କରେ । ଏହାଦ୍ୱାରା ନକାରାତ୍ମକ ଗୁଣଗୁଡିକ ହ୍ରାସ ପାଇବାକୁ ଲାଗେ । ବ୍ୟକ୍ତି ସୁଧୁରିଲେ ସମାଜ ସୁଧୁରେ । ସମାଜ ସୁଧୁରିଲେ ବିଶ୍ୱର ସମସ୍ତ ସମସ୍ୟା ସ୍ବତଃ ସମାପ୍ତ ହୋଇଯିବ । ତେଣୁ ସାଂପ୍ରତିକ ସମୟରେ ମୂଲ୍ୟ ଏବଂ ଆଧ୍ୟାତ୍ମିକ ଶିକ୍ଷା ଏକାନ୍ତ ଆବଶ୍ୟକ ।
🙏🙏🙏🙏🙏🙏🙏🙏🙏
ଯୋଗାଯୋଗ :
ସମ୍ପାଦକ, ଚେତନା ପ୍ରବାହ, ଶିବ-ଶକ୍ତି ହୋମିଓ ସେବା ସଦନ, ପାଟଣାଗଡ଼- ୭୬୭ଠ୨୫
ଜି: ବଲାଙ୍ଗିର, ମୋବାଇଲ ନମ୍ବର-9437210296, 7609969796
🙏🙏🙏🙏🙏🙏🙏🙏🙏
Comments
Post a Comment